Barish Ki Boonde

Chhatt ke oat se tapkati har Barish ki boond, chahati to hogi badal banke upar jaane ko,
Par gir jaati hai toot ke apne dhaar se, sirf auro ki pyaas bujhane ko...!!!

Milti hai judaaii apno se, aur milti hai ruswaaii unhe,
Jo bichhad chale hai apno se, aur peeche pachtane ko…!!!

Kya bhujhegi pyaas iss dharti ki unn Barish ki bundo se,
Jo chal pade apne gharo se, bas mitti me mil jaane ko…!!!

Kya milega uphar unhe, Itani badi balidano se,
Kya rakhegi Dharti Dil me, Ya chhod degi aur ganda ho jaane ko…!!!

Boonde giri hazaro yaha, kya milega anjaam unhe,
Ganga se milke puje jaye, Ya chhode jayenge naale me milke sadd jaane ko…!!!

Kuch Jal jayenge iss suraj se, kuch honge paas yaha,
Kuch pahuchenge dharti pe, apne armano ko aag lagaane ko…!!!

Jalte, marte, Bachte gir padenge dharti pe,
Kuch ko milega pyaar yaha, Kuch ko jillat ki zindagi jeene ko…!!!

Chham Chham karti ye boonde, Suhana kar jati hai mausam,
Aaye hai yaha pyaar nibhane ya apmaan ka badla lene ko…!!!

Indra-Dhanush ke rango se, Pyaar ka karenge ye abhivaadan,
Apmaan kiya to, rah jayenge iss dharti ko bhar jaane ko…!!!

Khilake phool iss dharti pe, pyaar nibhana sikha gaye,
Ab rahenge iss duniya me, iss pyaar ko aur gahara kar jaane ko…!!!

Sardi ne inko bada sataya, gher ke rakha khaddo me,
Chhod diya hai hamne unhe, Sardi se kathor ho jaane ko…!!!

Iss duniya ki beharahmi se wo pachhtaate aaj bhi hai,
Suraj ki garmi me jal kar, taiyaar ho gaye ab waapas jaane ko…!!!

Dharti pe ye ghor andhera, wahi kahani duhraati hai,
Kaale badal fir aaye hai, Dharti ki Pyaas bhujhane ko…!!!

“Jai” sochata rahta aaj yahi hai, dekh chamak inn baadalo me,
Ye khushi hai unki sath me hone ki, ya ailaan kiya hai inn boondo ne fir balidaan ho jaane ko…!!!


By,
Jai